ഈ രാത്രി നീ ഉറങ്ങിയിട്ടുണ്ടാവില്ലെന്നറിയുന്ന എനിയ്ക്ക്,

നീ കാത്തിരിയ്ക്കുന്ന ഗാഢമായൊരു നിദ്രയായ്
നിന്നിൽ നിറയണമെന്ന് തോന്നുന്നു.
നിനക്ക് ഉണരാൻ തോന്നാത്തൊരു സ്വപ്നമായ്
നിന്നിലുണർന്നിരിയ്ക്കാൻ തോന്നുന്നു.
നീ ഇതുവരെ നടന്നു തീർത്ത വഴികളിൽ
ഏറ്റവും മനോഹരമായ  യാത്രയായ്
നിന്നിലൂടെ വിരലുകൾ കൊണ്ട് നടക്കണമെന്ന് തോന്നുന്നു.
എന്നിലെ പാതി പകർന്നു വയ്‌ക്കേണ്ട
ചില്ലുപാത്രത്തിലേക്കെന്നതുപോലെ
നിന്നിലേക്ക് ഒഴുകിത്തുടങ്ങണമെന്ന് തോന്നുന്നു.
നീ നിന്നെ ഒളിച്ചുവെച്ച ഇടങ്ങളിലെല്ലാം ചെന്ന്
എന്നെ തിരയണമെന്ന് തോന്നുന്നു.
നിനക്ക് ഉണരാൻ തോന്നുന്ന നേരത്ത് മാത്രം ഉദിയ്ക്കുന്ന
നക്ഷത്രമായ് ആകാശത്തിലൊളിയ്ക്കണമെന്ന് തോന്നുന്നു.
നീ പകർന്നെടുക്കുന്ന
ചായ പാത്രത്തിന്റെ അരികു പറ്റിയൊരുറുമ്പായി
നീ കടന്നുപോകുന്ന നോവുകളത്രയും
കടിച്ചെടുക്കണമെന്ന് തോന്നുന്നു.
നീ ഒരു പകലാകുമ്പോൾ
നിന്നിലെ ചൂടും വെളിച്ചവുമാവണമെന്ന് തോന്നുന്നു.
ഇനി വരുന്നൊരു രാത്രിയിലേക്ക്
നിനക്ക് പുതയ്ക്കാനൊരു പുതപ്പിനായ്
തിരകൾ നെയ്തെടുക്കണമെന്ന് തോന്നുന്നു.

ഈ രാത്രി നീ ഉറങ്ങിയിട്ടുണ്ടാവില്ലെന്നറിയുന്ന എനിയ്ക്ക്,

നിന്നിലെ ഉറക്കമാവണമെന്ന് തോന്നുന്നു!