നിനക്കെഴുതുമ്പോൾ എന്റെ കൈപ്പട
ഗുഹാവാസികളുടേതാകുന്നു.
അക്ഷരങ്ങളിൽ മണ്ണിന്റെ ഗന്ധം.
വരികൾക്ക് കാട്ടരുവികളുടെ താളക്രമം.
എന്റെയുള്ളിലെനിക്ക്
വീശിയടിക്കുന്ന
നീ എന്ന കൊടുങ്കാറ്റിനെ
കേൾക്കാൻ കഴിയുന്നു.
ഒരു പേമാരി,
എന്റെ സന്ദേശങ്ങളെ
നിനക്കല്ലാതെ മറ്റൊരാൾക്കും മനസ്സിലാകാത്തവണ്ണം
മാറ്റി എഴുതുന്നു.
എന്റെയുള്ളിലെ കാട്ടുവാസിയാണ് നീ.
നിന്റെ പ്രാകൃതയാത്രകൾക്കൊപ്പം
വളരുന്ന കൊടുങ്കാടാകുന്നു ഞാൻ.