നിറമുള്ളൊരു മേഘത്തിന്റെ തുണ്ടെടുത്ത്,
അതിൽ
നിന്റെ പേരെഴുതുമ്പോൾ
മാത്രം
മഴയായ് ഞാൻ
മാറിപ്പോകുന്നു!

ഈ മഴക്കാലത്ത്
മേഘങ്ങളിലൂടെ
നമുക്ക് നടക്കേണ്ടതുണ്ട്.

മഴനനയാൻ വിരൽ നീട്ടുന്ന
ഇല ഞരമ്പുകളായ്
മാറിപ്പോകേണ്ടതുണ്ട്.

അന്യോന്യം പറയാതെ പോയ സ്നേഹവാചകങ്ങളുടെ
അരികിലൂടെ ചുവന്നവണ്ടുകളായ് വട്ടംചുറ്റേണ്ടതുണ്ട്.

മഴപെയ്യുന്നുണ്ട് നമ്മുടെ ചുറ്റിലും
എന്നാലും വേനൽ,
നമുക്കിടയിൽ മഴയെ വിയർപ്പെന്ന് മാറ്റിക്കളഞ്ഞിരിക്കുന്നു!