.. . അദൃശ്യമായ ഒരുപാടക്ഷരങ്ങളുണ്ട് സ്നേഹമെന്ന വാക്കില്..
ഓരോ പൂവിലുമുണ്ടൊരു പൂക്കാലം.
ഓരോ ദലവും ഒരു ആലിംഗനം.
ചുംബനങ്ങൾ, തേനടരുകൾ
നോട്ടങ്ങളുടെ ഉദ്യാനം.
നീയോ നല്ല തോട്ടക്കാരൻ.
എത്ര പാട്ടുകൾ നീ പങ്കിടാതെ നിന്നിൽ ഒളിപ്പിക്കുന്നു.
ഹൃദയമേ,
അവനോട് മിണ്ടുമ്പോൾ മാത്രം നീ വാക്കുകളെ ഉപേക്ഷിയ്ക്കുന്നതെന്തേ!
ഭാഷയെ മറക്കുന്നതും?
ഉള്ളമൊരു തൊട്ടാവാടിപ്പടർപ്പ് ..
(നീയോ വിരൽ നീട്ടുന്നു.)
ഓരോ പൂവിലുമുണ്ടാകും
പ്രിയപ്പെട്ട ഒരാൾ പകർന്നു വെച്ച
വിരലോട്ടങ്ങൾ.
പ്രിയപ്പെട്ട ഒരാൾ മറന്നു വെച്ച
കൺപാർക്കലുകൾ.
