നിന്റെ ചുണ്ടുകളുടെ ചിത്രം

ഞാൻ ഓർത്ത് വയ്ക്കുന്നു - വരയ്ക്കുന്നു.

(ആ) ഇലയരികുകളെ

(ഞാൻ) തൊട്ട നേരങ്ങളെ നീയും.

 രണ്ടുപേർ

ഇരുകരകളിലേക്ക്

ഒരേ രാത്രി തുഴയുന്നു.

അവനവനാഴത്തിലേക്ക്

അറ്റമില്ലാത്തൊരു ജലയാത്ര.

 പ്രണയത്തിന്

ഒരു പട്ടത്തിന്റെ ആകൃതിയാണ് ;

ജീവന്റെ നിറവും.

അതിന്റെ ധമനികളിലാകെ

അതേ പിടപ്പ്

- പ്രാണന്റെ പല ചിറകുകൾ.

നിന്റെ വിരലിൽ

ഒരു പട്ടത്തിന്റെ ചരട്

ഞാൻ കെട്ടിയിടുന്നു -

ഒരു കൊടുംങ്കാറ്റിൽ അതിനെ സങ്കല്പിക്കുന്നു.

പ്രിയപ്പെട്ട ഒരാളെ
ഉള്ളിൽ
ഒരു നദിയെന്നപോലെ
വരയ്ക്കുക ഇങ്ങനെയാണ്:
കാത്തിരിപ്പിന്റെ മഹാസമുദ്രമെന്ന പേര്
സ്വയം സ്വീകരിച്ചു കൊണ്ട്