ഓർക്കുന്നതേയില്ല ഈയ്യിടെ
എന്നറിയുമ്പോൾ
കൂടുതൽ സന്തോഷം തരുന്നു
പ്രണയങ്ങളിൽ ചിലത്.


ഒരു ഓർമ്മ കൊണ്ട് പോലും
തൊട്ട് നോവിയ്ക്കരുത്
എന്ന് കാവൽ നിൽക്കുന്നു
പ്രണയങ്ങളിൽ ചിലത്.



പറഞ്ഞു തുടങ്ങേണ്ടത് ഇങ്ങനെ ആയിരുന്നില്ലേ എന്ന്
ആദ്യം മുതൽക്ക് ഒരു വട്ടം കൂടിയെന്ന്
അനുവാദം ചോദിയ്ക്കുന്നു
പ്രണയങ്ങളിൽ ചിലത്.



ഇങ്ങനെ കാത്തുനിൽക്കുന്ന
പ്രണയങ്ങളുടെ ചില്ലമേലെല്ലാം ഊഞ്ഞാൽ കെട്ടി
നിർത്താതെ ആടുന്നുണ്ട്

എന്നിലെ,

പറയുന്ന വാക്കുകളെല്ലാം
ചിരിയിൽ പൊതിഞ്ഞു കെട്ടി
കേൾക്കാതെയാക്കുന്ന,
മുടി പിന്നിയിട്ട
ആ പെൺകുട്ടി.