പ്രേമത്തിന്റെ
അക്ഷാംശ രേഖാംശങ്ങളെക്കുറിച്ച്
നാം അന്യോന്യം അടക്കം പറയുന്നു.

നിനക്കറിയില്ലേ
അതിന് അതിരുകളും
അതടയാളപ്പെടുത്താനിടങ്ങളും
ഇല്ലെന്ന്.
അത് ഒരാകാശഗോളത്തിലും പാർക്കുന്നില്ലെന്ന്.
അതിന് കടലെന്നോ കരയെന്നോ ഇല്ലെന്ന്.
അത്
പരസ്പരം ഒട്ടിച്ചേർന്നാലോ എന്നോർത്ത്
ശ്വാസം പിടിച്ചു നിൽക്കുന്ന
വായുകണങ്ങൾ മാത്രമാണെന്ന്.
അതിന്റെ അവസാനിക്കാത്ത
കമ്പനങ്ങൾ മാത്രമാണെന്ന്.
അത് കടന്നുപോകാൻ
ഒരു വടക്കുനോക്കിയന്ത്രം വേണ്ട എന്ന്.