ഒരു നാൾ
എന്നെ മറക്കണമെന്ന്
നിനക്ക് തോന്നുമ്പോൾ
നിന്റെ
ഏത് ഓർമ്മയിലാണ്
എന്നെ നീ
ഒളിപ്പിച്ചു വയ്ക്കുക?

ഒരു നാൾ ഞാൻ

തീർത്തും

നിശബ്ദയായാൽ

ഏത് ശബ്ദം കൊണ്ടാണ്

നീ എന്നെ

വീണ്ടും

കേൾക്കുക?

ഒരു നാൾ ഞാൻ

തീർത്തും

മാഞ്ഞുപോയാൽ

ഏത് നിറം കൊണ്ടാണ്

നീ എന്നെ

വീണ്ടും

വരച്ചെടുക്കുക?

ഒരു നാൾ ഞാൻ

തീർത്തും

ഒഴുകി പോയാൽ

ഏത് കടൽ വറ്റിച്ചാണ്

എന്നെ നീ

തിരിച്ചെടുക്കുക?

ഒരു നാൾ ഞാൻ
തീർത്തും
ബാഷ്പമായാൽ
എന്നെ നീ
ഏത് മേഘച്ചോട്ടിലാണ്
കാത്തുനിൽക്കുക?

ഒരു നാൾ

എന്നിലെ ആൾക്കൂട്ടം

എന്നിലാകെ ചിതറിയോടുമ്പോൾ

ഏത് പേർ വിളിച്ചാണ്

എന്നെ നീ

നിന്നോട് ചേർക്കുക?