ഏഴ് ഭാഷകൾ അറിയാവുന്ന ഒരുവളെ ഞാൻ സ്വപ്നം കാണുന്നു.
ഏഴ് ഭാഷകളിൽ അവൾ കത്തുകൾ എഴുതുന്നു.
കത്തുകൾ ഏഴ് ഭാഷകളിൽ കവിതകളാകുന്നു.

ഏഴ് ഭൂഖണ്ഡങ്ങളേയും അവൾ പ്രണയിക്കുന്നു.
ഏഴ് സമുദ്രങ്ങളേയും അവൾ കേൾക്കുന്നു.
ഏഴ് കരകളിൽ അവൾ പുഴകളെ തിരയുന്നു.

ഏഴ് വയലുകൾ അവളെ മൂളുന്നു.
ഏഴ് കാടുകൾ അവളെ ശ്വസിക്കുന്നു.

ഏഴ് നഗരങ്ങൾ അവൾക്ക് വീടൊരുക്കുന്നു.
ഏഴ് അതിരുകൾ അവളിൽ അലിയുന്നു.
ഏഴ് തെരുവുകൾ അവളിൽ തുടിക്കുന്നു.

ഏഴു രാത്രികൾ അവളൊപ്പം നനയുന്നു.
ഏഴു പൂക്കളിൽ അവൾ പുലരിയാകുന്നു.
ഏഴ് ദൂരങ്ങൾ അവളിൽ കിതയ്ക്കുന്നു.

മേഘവഴികളിൽ അവൾ ഏഴ് വിരൽ തൊടുന്നു.
ഏഴ് കിളികളൊടൊപ്പം കഥകൾ പാടുന്നു.

ഏഴ്
വിസ്മയങ്ങളുടെ വീട്ട് നമ്പറാണ്;
അവളുടെ പാർപ്പിടത്തിന്റെ ഒറ്റയക്ക അടയാളം.