പ്രണയത്തേക്കാൾ വലിയ സ്വകാര്യം മറ്റെന്താണ്‌!

ഒരുപാട് സ്വകാര്യങ്ങൾ ഉള്ളവർക്കും
ഒറ്റ സ്വകാര്യം പോലും ഇല്ലാത്തവർക്കും
ഇത് മനസ്സിലാവില്ല.

ജീവന്റെ ഘടികാരസൂചിയിൽ ഒട്ടിച്ചേർന്നു പോകുന്ന
' നീ മാത്രം നീ മാത്രം'
എന്ന ഈ സ്വകാര്യത്തിലെ തീവ്രാനുഭവം!

ഓരോ കോശങ്ങളേയും തൊട്ട് തൊട്ടത് പാഞ്ഞു പാഞ്ഞു പോകുന്നതിന്റെ കമ്പനങ്ങൾ.

നീ ഭൂമിയിലെങ്കിൽ ഞാനിരിപ്പുണ്ട് ആ ചന്ദ്രനിലെന്ന് ഓരോ യാത്രയിലും ഓടിയോടിവന്ന് നമുക്ക് മാത്രമായൊരു കാഴ്‌ചയാകുന്നത്. ആരോടെന്നില്ലാതെ സ്വയം നിറഞ്ഞ് ചിരിയ്ക്കാനനുവദിയ്ക്കുന്നത്.

ശ്വാസം പോലെ അദൃശ്യമാണത്.

പ്രാണൻ പോലെ പ്രിയമേറിയതും.
ഒരോ ഹൃദയമിടിപ്പിലും അനുഭവിക്കാനാകുന്ന അതിന്റെ കരുതൽ!

ഒരാളോട്
ഒരാളോട് മാത്രമായ്
ജീവിതം മുഴുക്കെ
ഒരിയ്ക്കലെങ്കിലും
പ്രണയം അനുഭവിച്ചിട്ടുണ്ടെങ്കിൽ പറയൂ
അതിനേക്കാൾ ഹൃദ്യമായ, വിസ്‌മയകരമായ സ്വകാര്യം മറ്റേതാണ്?