ഇന്ന്
എന്റെയുള്ളിലിത്തിരി ലഹരിയുണ്ട്.
ഞാനുപേക്ഷിച്ച മുറിവുകളെ
നിന്റെ അസാന്നിധ്യം ചേർത്ത്
 വാക്കുകളിലാക്കി
നിറയെ
പാനം ചെയ്തിട്ടുണ്ട്.

ഒന്നുറങ്ങണമീ രാത്രി.

ഋതുഭേദങ്ങൾ ഏല്ക്കാത്ത പൂക്കൾ
പറിച്ചു കൊണ്ടുവരിക.
അത് നിറയെ ചൂടി
ഈ രാത്രി നമുക്കൊന്നിച്ചുറങ്ങാം-
രണ്ട് കരകളിലെങ്കിലും
കണ്ണുകളെപ്പോലെ ഒന്നിച്ച്.

ഒന്നിച്ചുണർന്നിരിക്കുന്ന
നേരങ്ങളിൽ
നമുക്ക് നമ്മെക്കുറിച്ച് മാത്രം പറയാം.
നാമന്യോന്യമെത്ര സ്നേഹിക്കുന്നുവെന്ന്..
ഒന്നിച്ചിരിയ്ക്കാൻ
ഒന്ന് ചിരിയ്ക്കാൻ
നമ്മളെത്ര ആഗ്രഹിക്കാറുണ്ടായിരുന്നെന്ന്..

നീ ഉമ്മവച്ചുമ്മവച്ചുണക്കിയ മുറിവുകളിൽ
ജീവൻ മൊട്ടിട്ടുതുടങ്ങിയത് നിനക്കന്ന് ഞാൻ കാട്ടിത്തരും.

ഏറ്റവും സന്തോഷവതിയായിരിക്കെ
ഞാൻ
എന്റെ സ്നേഹം
നിന്നെ
അറിയിക്കും.

ഇന്ന്
എന്റെയുള്ളിലിത്തിരി ലഹരിയുണ്ട്.
ഞാൻ മുറിച്ചു വെച്ച ഓർമ്മകളെ
നിന്റെ തണുത്ത മൗനം ചേർത്ത്
നിറമുള്ള വാക്കുകളിലാക്കി
നിറയെ
പാനം ചെയ്തിട്ടുണ്ട്.

എന്നെ മറന്ന്
ഒന്നുറങ്ങണമീ രാത്രി.