ഞാൻ എന്നതും
നീ എന്നതും
പര്യായപദങ്ങളാകുന്ന ഒരു ഭാഷയിൽ
പ്രപഞ്ചത്തിന്റെ സംഗീതം കേൾക്കുന്നു.
നാം സമുദ്രങ്ങളുടെ നൃത്തമാകുന്നു.
പ്രണയഭ്രമണത്താൽ
നമുക്കുള്ളിലെ തിരകളെല്ലാം
ചിപ്പികളും ശംഖുകളുമാകുന്നു.
പ്രണയഭ്രമണത്താൽ
നമുക്കുള്ളിലെ തീരങ്ങളെല്ലാം
വാക്കുകളും ചിത്രങ്ങളുമാകുന്നു.
നാം ഭൂപടങ്ങളുടെ സൂചകമാകുന്നു.
ഞാൻ എന്നും നീ എന്നും
ഒറ്റവാക്കു കൊണ്ട് പറയാനാകുന്ന ഒരു ഭാഷയിൽ
പ്രപഞ്ചത്തെ നാം എഴുതിത്തുടങ്ങുന്നു.