നനുത്ത ശബ്ദത്തിൽ
പക്ഷിയേയും
ഉറച്ച ശബ്ദത്തിൽ
ഇലകളേയും
ഇതാ വരച്ചു തുടങ്ങുന്നു.
നിറഞ്ഞ നിശബ്ദത കൊണ്ട്
മരത്തേയും
തികഞ്ഞ ഏകാന്തത കൊണ്ട്
കൂടിനേയും
അതിനു മുൻപേ വരച്ചതോർക്കുന്നു.
വാക്കിന് മാത്രം നല്കാൻ സാധ്യമായ
പറക്കലുകൾ പക്ഷിയ്ക്കും
കേൾവിക്ക് മാത്രം നല്കാൻ സാധ്യമായ
മഴപ്പെയ്ത്ത് മരത്തിനും
നല്കുന്നു.
എന്നിട്ടും അത്ര ലളിതമല്ല -
കൂട് വിട്ട് പറക്കലുകൾ -
പക്ഷിയ്ക്കും
ഇലകൾക്കും
ആർക്കും.