നിനക്കറിയാലോ ഞാനും ഇങ്ങനെയാണ് എന്ന്.

എന്റെ വാക്കുകൾ കൊണ്ട് മുറിവ് പറ്റുന്ന നിന്നെ 

ആവോളം മനസ്സിൽ ലാളിക്കാറുണ്ട് എന്ന്.

എന്റെ ഒരു വാക്കിൽ 

ചിലപ്പോൾ

നിന്നിലെ ചലനങ്ങൾ അറ്റുപോകാറുണ്ട്.

വാക്കുകൾ ബാഷ്പമായ് മാറിപ്പോകാറുണ്ട്.

നിശ്ചലമായ ഒരു ദ്വീപ് പോലെ നീ.

നിശബ്ദത കൊണ്ട് നിറഞ്ഞു പോകുന്നു ത്ത നേരം നിന്റെ നോട്ടങ്ങൾ.

എനിക്ക് എന്ത് ഇഷ്ടമാണെന്നോ അത് കണ്ടിരിക്കാൻ.

നിന്നിലെ

ഒരോ കോശങ്ങളേയും 

കോർത്ത് കോർത്ത് 

നിന്നെ തുന്നിയെടുക്കുന്ന കൂർത്ത സൂചിയാകുന്നു

എന്റെ പ്രണയം.

അത് നിന്നിലൂടെ പാഞ്ഞു പാഞ്ഞു

പോകുന്നതിന്റെ വേദന

എനിക്കും അനുഭവിക്കാനാകുന്നു.

ഒലിച്ചു പോകുന്ന ഒരു അരുവിയല്ല പ്രേമം. 

പകരമത് പതുക്കെ ഒഴുകുന്ന ഒരു ലാവയാണ്.

തീ പിടിച്ച - കനല് പാകുന്ന - പ്രവാഹം.

രണ്ട് പേരിൽ അത് അവശേഷിപ്പിക്കുന്ന

പൊള്ളലുകൾ.

ഓരോ ശ്വാസത്തിലും അത് അനുഭവിക്കണം എനിക്ക്.

അത്രമേലെന്റെ പ്രേമത്തിന്റെ പ്രേമമേ !

ഞാൻ

നീയെരിഞ്ഞ കവിതയ്ക്ക്

ചാരം.