ഇലകൾക്കിടയിൽ പക്ഷിയെ
വരയ്ക്കുന്നത്
എങ്ങനെയാണ്?
പച്ച നിറം കൊണ്ട്?
ആകാശം എന്ന വാക്ക് കൊണ്ട്?
ചിറകൊതുക്കിയൊതുക്കി
മഴയെ കേട്ടുകേട്ടിരുന്ന
പക്ഷികളാണോ
അടുത്ത പുലരിയിൽ
ഇലകളായ് മുളയ്ക്കുന്നത്?
പൊഴിഞ്ഞു വീഴുമ്പോൾ
ഇലയിൽ തൂവലുകൾ വരച്ചു വെച്ചാൽ
അത്
തനിയെ
പക്ഷിയായ് പറക്കുമോ ?
ഒരു മരത്തിന്റെ പറക്കാനുള്ള മോഹത്തെ
മേഘമെന്ന വാക്കിൽ
ആകാശം മുഴുവൻ
എഴുതി നിറയ്ക്കുന്ന
പക്ഷികളെപ്പോലെ -
പറക്കൂ എന്ന വാക്കു കൊണ്ട്
ഇലകൾക്കിടയിൽ പക്ഷിയെ
വരയ്ക്കാൻ
മരത്തിനല്ലാതെ
മറ്റാർക്കാണ് കഴിയുക ?